Аслида, сўнги ойлардаги воқеалар айнан шуни кўрсатмоқда эди. Россия шиалар ҳукмронлик қилаётган Сурия, Ироқ ва Эрон билан бирлашиб, Яқин Шарқдан Ғарбни сиқиб чиқариш ва у ерда ўзи лидерлик қилиш учун жиддий ҳаракат бошлади. Аммо, кўпчиликда АҚШ тарафидан ҳокимиятга олиб келинган Ироқдаги шиалар бундай ишларга қўшилишига шубҳа бор эди.

Кеча бу шубҳалар йўқ бўлди. Ироқ парламенти Мудофаа ва Хафсизлик Комитети раиси Ҳаким ел Заминий Россия ва Ироқ Суриядан Ироққа қочган ИШИД жангариларига биргаликда ҳаводан ҳужум қилиш хусусида келишишганини эълон қилди. Ироқ параламенти депутати Замилий Эроннинг Фарс агентлигига берган интервьюсида яна ҳам очиқроқ гапирибди. Унга кўра, Ироқ ҳукумати Россияга ИШИДнинг Ироқдаги объектларини ҳаводан бомбалашга рухсат берган.

Ваҳолангки, Ироқда АҚШ бошчилигидаги Ғарб коалицияси сал кам 1 йилдан бери ИШИДга қарши ҳаводан ҳужум қилиш билан шуғулланар эди. Ироқ бу коалициядан умидини узган шекилли, энди Россия билан бирга бўлмоқчи.

Ҳа, Яқин Шарқда Россиянинг кучи кун сайин ортиб бормоқда. Аввалги таҳлиллармиздан ҳам маълумки, Россия Президенти Владимир Путиннинг бундай ҳужумкор сиёсати маълум вақт самаралидек кўринса керак. Аммо, Россиянинг иқтисодий аҳволи Ғарбнинг санкциялари остида кун сайин ёмонлашиб борар экан, узоқроқ муддатда унинг ҳоли “вой” бўлиши аниқ.