Россия ИШИД ва Башар Асад режимини йиқитиш ниятида бўлган бошқа ҳарбий гуруҳларга қарши 30 августда ҳаводан уриш бошлагач, ўз мувафаққиятларини кўрсатиш учун бўлса керак, Россия расмийлари жангарилар ёппасига Суриядан қочишни бошлаганлари ҳақида баёнотлар берган эдилар. Аслида, ўша баёнотларга ишониш қийин эди. Чунки, масалан, ИШИДга кирганларнинг мутлақо кўпчлиги ўлимга ҳам тайёр бўлган, ўз дини учун ўлса, жаннатга тушишига ишонган фанатиклардир. Уларнинг бир қисмини ИШИД раҳбариятининг ўзи атайлаб чет элларга, биринчи навбатда, Ғарб давлатларига қочқинлар сифатида жўнатиш ҳаракатига тушган бўлишининг эҳтимоллиги катта. Мақсад – ўлимга тайёр жиҳодчиларни Ғарбга жўнатиб, ичкаридан Ғарбга қарши уруш очиш.

Кеча Россия Мудофаа вазирлиги тамоман қарама-қарши йўналишдаги баёнот эълон қилди. Бу ҳақда русларнинг расмий давлат агентлиги “Новости” хабар берди. Вазирликка кўра, бандит гуруҳларнинг раҳбарлари, Сурия армияси ҳужумлари остида қурбонлар кўпайгандан кейин, уларнинг ўрнини тўлатиш учун чет элдан кўплаб янги жиҳодчилар олиб келишмоқда эмиш.

Мана бу хабарга ишониш мумкин, дейди мухбиримиз. “Бирлик” лидери Абдураҳим Пўлат айтаётганидек, ҳатто АҚШ Президентига ёзган хатида урғулагандек, ислом терроризмининг илдизлари Қуръоннинг хато тафсиридан келиб чиқаётган хато ишончлардадир. Демак, кимдир мусулмонларни ўша ишончларга таяниб жиҳодга чақирса, чақириққа жавоб берадиган мусулмонларнинг сони катта бўлаверади.

Демак, ислом терроризмини бутунлай йўқ қилишнинг ягона йўли – Исломда чуқур ислоҳотлар ўтказиш ва ислом дунёвийлик/секуляризм принципини қабул қилишига эришишдир. Ана ўшандагина Ислом дунёси ривожланиш йўлига ўтади, ҳозирги қашшоқ ва қолоқликдан чиқади. Жиҳод шиори остида террорчилик билан шуғулланишга ҳожат ҳам қолмайди.