10 October 2015
18:37 - Анқарада бугунга режалаштирилган митинг олдидан 2 портлаш бўлди, 86 киши ўлди
Бугун Анқарда маҳаллий вақт билан 16:30 да, яъни айнан шу хабаримиз ёзилаётган дақиқаларда “Террорга – Йўқ, биродарликка – Ҳа” шиори остида 100 минг киши иштирок этадиган митинг бошланиши керак эди. Митингни касаба уюшмалари ташқил қилган бўлиб, таниқли санъат арбоблари уни қўллаб-қувватлаганди.

Аммо, митинг ўрнига даҳшатли воқеалар юз берди. Эрталаб соат 10 ларда митинг қатнашчилари йиғилишга бошлаган жойлардан бирида, яъни Анқара темир йўл вокзали олдида кимлиги номаълум одамлар тарафидан бомба портлатилди. Бир неча дақиқадан кейин иккинчи портлаш бўлди. Хабарлардан тушуниб бўлмайди, иккинчи портлаш ҳам ўша жойда бўлдими ёки бошқа тўпланиш ерида.

Аввалига портлашларда 30 киши ўлгани хабар қилинди, аммо ҳозиргина Ички ишлар вазирлиги тарқатган расмий маълумотларга кўра, 86 киши ўлган, 200 га яқин одам яраланган. Яраланганларнинг 28 нафари оғир аҳволда. Демак, ўлганлар сони яна ортади.

Қайтариб айтамиз, портлашни ким уюштиргани номаълум, аммо террор деганда курдларнинг ПККси бутун Туркия бўйлаб ҳар куни уюштираётган қонли портлашлар ва ҳужумлар назарда тутилаётганини ҳамма тушунади ва билади. Шундай экан, “террорга –йўқ” дейиш учун митингга келаётганларга ҳужумни айнан ПККчилар уюштиргани ҳаёлга келиши табиийдир.

Полициянинг фикрича, портлашларни 2 ўлимчи-террорист амалга оширган. Митингни айнан курдлар уюштираётган эди, портлашларни эса полиция уюштирди каби фикрлар ҳам тарқатилмоқда. Ҳозирча воқеаларнинг ривожланишини кутишдан бошқа йўл йўқ.
« Олдинги хабар Хабарлар рўйхати Кейинги хабар »