Тошкент вақти - 
10 October 2015
10:04 -
Туркияда Фатхулла Гуленга тегишли Today's Zaman газетасининг бош редактори ҳибсга олинди, бошқа бир машҳур журналист бир йил қамоқ жазоси олди
Бу мамлакатда Замон (Zaman) газетасининг инглизча варианти “Бугунги Замон” (Today's Zaman) номи остида чиқади. Исломчилиги билан танилган бу икки нашр расман бўлмаса ҳам феълан Фатхулла Гуленникидир. Бу одам аввал Нурчилар жамоасининг лидерларидан бўлган, ҳозир ўзи тузган “Хизмат” ҳаракатининг лидери ҳисобланади. У ўтган асрнинг охирларида исломчилиги учун қамалиш хавфи остида Туркиядан қочиб АҚШга келди ва ўшандан бери шу ерда яшайди. У ва унинг тарафдорлари яқин вақтгача ҳозирги Туркия Президенти Ражаб Эрдўғонни қўллаб-қувватлаб келдилар, айнан шу сабабли, уларга давлатнинг ҳамма идораларида ишга олиндилар. Яъни, Ражаб Эрдўғон тарaфидан тузилган ва ҳозир ҳокимиятда бўлган Адолат ва Тараққиёт Партияси (АТП) билан “Хизмат” ҳаракати Туркияни исломий давлатга айлантириш йўлида биргаликда кураш олиб бордилар. АТПнинг ҳокимиятга келишида фатхулла-гуленчиларнинг ҳам катта ҳиссаси бўлган. Эрдўғон ҳам қарз бўлиб қолмаслик учун, фатхулла-гуленчиларга ҳокимият структураларида жуда кўп лавозимлар берганди.
Аммо, ўтган йилнинг декабрь ойида АТПчилар билан “Хизмат”чилар ўртасида ҳокимият учун ички уруш бошланди. Эрдўғон фатхулла-гуленчиларни давлат ичида давлат яратишда айблаб, уларга қарши кўплаб жиноий ишлар очтирди. Фатхулла Гулен устидан ҳам очилган. Ички урушда ҳокимиятда бўлган АТПнинг қўли баланд келаётгани ҳам тушунарлидир.
Хуллас, шу ички уруш доирасида Today's Zaman газетасининг бош редактори Булент Кенеш (Bülent Keneş) устидан Ражаб Эрдўғонни ҳақорат қилиш айбномаси билан бир неча ой аввал жиноий иш очилди, уни ҳибсга олиш қарори ҳам чиқарилди. Бироқ, ҳали давлат идораларида яхшигина кучга эга бўлган фатхула-гуленчилар бу қарорни бекор қилдирдилар. Кеча эса, Истанбул шаҳар прокуратураси Булент Кенешни ҳибсга олиш ҳақида янги қарор чиқарди ва у ҳибсга олинди.
Демак, исломчиларнинг ички уруши давом этаверади.
Аммо, сўз эркинлигини бўғиш ҳаракатлари исломчиларнинг ички уруши ташқарисида ҳам давом этмоқда.
Кеча Истанбул шаҳри туманларидан бирининг суди машҳур турк журналисти ва сиёсий шархловчи Уғур Дундорни (Uğur Dündar) АТПли собиқ вазирни ҳақарот қилишда айблаб, унга 1 йил 2 ойлик қамоқ жазоси берди. Кейин қамоқ жазосини амалга ошириш бир йилга кечиктирилди.
