01 October 2015
20:22 - Тошкентда яна бир мулозим пора билан ушланди, бунинг охири борми? “Ҳаракат”: Охири йўқ!
Коррупцион Ўзбекистонда пойтахтдаги кадастр хизматларидан бирининг ходими 800 доллар пора олаётганида ҳибсга олинди. “Огоҳ” нашрининг ёзишича, фуқаро Дилмурод Кабиров Шайхонтоҳур туманида жойлашган уйига туман ҳокимининг эгалик ҳуқуқини белгилаш ҳақида қарор чиқарилиши ва кадастр ҳужжатларини расмийлаштириш мақсадида мазкур хизмат билан шуғулланувчи идора бўлимига келибди. Бу ерда муҳандис лавозимида ишлаб келаётган Нурматилла Ҳабибов хизматлари эвазига 800 АҚШ доллари сўраган.

Фуқаро Дилмурод Кабиров амалдорга 200 доллар ташлаб ҳам кетган, аммо пулнинг қолган қисмини бергиси келмаганми, воқеа ҳақида ҳуқуқни муҳофаза қилиш органларига ариза ёзган. Хуллас, кадастр мулозими пулнинг қолган 600 долларини олаётганида қўлга туширилган. Суд эса мансабдорни жарима орқали жазолаш билан чекланган.

Тушуниш керакки, дейди мухбиримиз, автомобиллар бор экан автоҳалокатларни йўқ қилиб бўлмагани каби, Оллоҳ яратган одамлар бор экан порахўрлик ва коррупцияни фўқ қилиб бўлмайди? Унда нима қилиш керак?

Минг хил усуллар билан автоҳалокатларнинг сони минималлаштирилаётган каби, порахўрлик ва коррупцияни ҳам минималлаштириш керак. Минималлаштиришнинг йўли аниқ – демократия. Демак, коррупция ва порахўрликка қарши курашмоқчи бўлганлар демократия учун курашни асосий вазифа қилиб олишлари керак.
« Олдинги хабар Хабарлар рўйхати Кейинги хабар »