29 September 2015
08:51 - Путин ҳам БМТ Бош Ассамблеясида нутқ сўзлади, аммо пичоққа илинадиган бир нарса айтолмади, кейин Барак Обама билан учрашди
Кеча БМТнинг Бош Ассамблеясида Барак Обамдан кейин Россия Президенти Владимир Путин ҳам нутқ сўзлади. Унинг нутқида пичоққа илинадиган биттагина жой бор. У ҳам бўлса, демократияни бошқа давлатларга экспорт қилмаслик кераклиги ҳақидаги гапларидир.

Қаранг, Россия сўнги ўн йилликларда Ғарб яратган техник янгиликлар ва технологиялар билан яшамоқда. Уларнинг экспорт қилинишига Россия қарши эмас, аммо демократиянинг экспорт қилинишига қарши эмиш. Бечора Путин ҳалигача демократия сўнгги асрларнинг энг буюк ихтироси эканлигини, демократия техник янгиликлар ва технологиялардан ҳам муҳим эканлигини тушунмаслигини кўрсатибди. Ваҳолангки, ҳозир демократияни экспорт қилмасдан дунёнинг қолоқ давлатларини олға судраб бўлмайди.

Кейин Обама ва Путиннинг аввалдан режалаштирилган 50 дақиқалик учрашуви 1,5 соатгача чўзилиб кетибди. Учрашув ҳақида бундан бошқа муҳим нарса айтилмайди. Тарафлар Украина ва Суриядаги аҳволни муҳокама қилиб, бу икки мамлакатдаги кризисни битириш хусусида гаплашишган. Аммо, биронта йўналишда келиша олишмаган. Демак, Сурия ва Украинада уруш давом этаверади, Ғарб-Россия совуқ уруши авжига чиқаверади. Совуқ урушни ютиш учун Россиянинг на пули, на кучи бор.
« Олдинги хабар Хабарлар рўйхати Кейинги хабар »