Кеча Боку атрофидаги шаҳарчалардан бирида Озорбайжон Халқ Фронти Партиясининг VIII қурултойи ўтказилгани демократик мухолифатга яқинлиги билан билинган contact.az Интернет нашри тарафидан хабар қилинди. Партиянинг маҳаллий органлари тарафидан сайланган 358 делегатдан 300 (!!!) нафари қатнашган қурултой қонуний деб ҳисобланган.

Ҳисобот нутқи сўзлаган партия раиси Али Керимли (расмда) мамлакатда демократия йўқлиги, 2000 йилда партия раиси Элчибей оламдан ўтгандан бери партия мавжуд режимнинг босими остида яшаётгани, унинг фаоллари қамалаётгани, партияга ҳатто расмий офис олиш имконияти берилмаётгани каби фактларни санаб ўтар экан, бунга қарамасдан, партия ҳаётда эканлиги ва мавжуд режимга альтернатив бўлиб қолаётганини урғулаган.

Партиянинг сўнги йиллардаги ғалабаси сифатида партия ва диндорлар ўртасидаги тушунмовчиликлар ҳал этилгани, дунёвий/секуляр ҳуқуқий давлат яратиш масаласида умумий фикрга келингани урғуланган.

Али Керимлига кўра, ОХФП порахўрлик, коррупция ва халқ бойлигини талон-тарож қилинишига қарши курашнинг бошида турибди, айни замонда, сиёсий маҳбусларни озод қилиш учун ҳам курашмоқда, оммавий митинглар ўтказмоқда.

Лекин, Озорбайжонда ҳеч қандай демократик шароит йўқлиги сабабли, ОХФП яқинда бўладиган парламент сайловларида иштирок этмоқчи эмас.

Қурултойнинг охирида Али Каримли қайтадан партия раиси этиб сайланди, 65 кишилик Олий Кенгаш ҳам сайланди.

Қардош турк давлатида мухолифатнинг асосий кучи ҳисобланадиган партия ўз қурултойини ўтказгани ўзбекларни ҳам қизиқтириши керак, дейди мухбиримиз. Қаранг, демократиядан узоқ бўлган давлатда нафақат ОХФП, балки, бошқа бир қатор демократик партиялар расман рўйхатдан олинган, улар очиқча қурултойлар ўтазиш имкониятига эга, демократик мухолифат Демократик Кучларнинг Миллий Кенгаши номи остида коалиция ҳам қурган. Аммо, қоғоздагина бор бўлган бу коалициянинг раиси ҳеч қачон сиёсат билан шуғулланмаган тарихчи олим.

Мухолифатнинг муаммолари шулардир. Аммо, ОХФПнинг кечаги қурултойида бу муаммолар умуман тилга олинмаган, демак мухолифат майдонида ҳеч нарса ўзгармайди, тарқоқлик давом этади. Қолаверса, демократик мухолифат билан исломчилар дунёвий давлат яратиш масаласида келишганларига ишонадиган аҳмоқ топилмаса керак.

Озорбайжон мухолифати эртами-кеч биз кўтараётган масалалар билан шуғулланишга мажбур бўлади, дейди “Бирлик” лидери Абдураҳим Пўлат. Тоталитар диктатуралар билан курашиш учун бир-бирларидан фарқни ўзлари ҳам тушунмайдиган партиячаларнинг коалицияси етарсиздир. Ҳаммани битта партияга бирлаштириш, бирлашишни истамаётган лидерчаларни сиёсатдан йўқ қилиш лозим. Тўғри, бу ҳам осон иш эмас. Аммо, бошқа йўл йўқ.