25 September 2015
08:38 - Владимир Путин 28 сентябрь куни Нью-Йоркда Барак Обама билан учрашиб, уни ҳам алдайман деган умидда
АҚШ ва Россия президентлари БМТ Бош Ассамблеясининг 70-чи сессияси доирасида 28 сентябрь куни учрашув ўтказишлари ҳақидаги хабар аввалига АҚШнинг ахборот воситалари тарафидан тарқатилди. Учрашув Путиннинг ташаббуси билан бўлаётгани ҳам айтилди. Кейин бу хабар Путининг матбуот котиби тарафидан тасдиқланди.

Барак Обама Россия президенти билан Сурия ва Украина масалаларини муҳокама қилмоқчи эканлигини айтибди. Тахмин қилиш қийин эмаски, Путиннинг мақсади – Россияга қарши киритилган Ғарбнинг санкцияларини юмшатишга ҳаракат қилишдир.

Бу учрашувдан кейин Россиянинг АҚШ ва умуман Ғарб билан муносабатларида бирон нарса ўзгаришини кутиш керак эмас. Аммо, Путин АҚШ Президентидан бир нарсалар ундиришга умид қилаётгани шубҳасиздир. Чунки, у БМТ Бош Ассамблеясида нутқ сўзлаш учунгина Нью-Йоркга келаётганига аҳмоқ ҳам ишонмайди.

Владимир Путин 2001 йил 9 сентябрда ал-қоидачиларнинг Нью-Йоркдаги эгизак минора-бинолар ва Пентаганга қарши уюштирган террористик ҳужумларидан кейин қаердадир бункерда яшириниб ётган ўша пайтдаги АҚШ Президенти Жорж Бушга биринчи бўлиб телефон қилган ва уни маълум вақтга ўзига мойил қилиб олганди. У бечора ҳозир Барак Обамани ҳам алдайман деб умид қилаётгани ўта ибтидоийликдир.