22 September 2015
16:29 - Дунё лидерлари Нью-Йоркга кетишмоқда, Ислом Карим ҳам бориши керак
Маълумки, 16 сентябрда Нью-Йоркда Бирлашган Миллатлар Ташкилоти Бош Ассамблеясининг 70-чи, яъни юбилей сессияси иш бошлади. Одатда бундай сессиялар расмиятчилик учунгина ўтказиладиган мажлислардан иборат бўлиб, ҳеч кимнинг улар билан иши ҳам бўлмайди. Аммо, бу йилги сессия юбилей сессияси бўлишдан ташқари, жаҳон миқёсидаги 2-чи совуқ уруш бошланган, балки, авжига чиқаётган вақтга тўғри келди. Шу сабабли, унга эътибор одатдагидан кўпроқ.

Россия Президенти Владимир Путин бу сессияга боришини аллақачон эълон қилиб бўлган. Ёш бола ҳам тушунадики, унинг асосий мақсади - сессия баҳонасида АҚШ Президенти Барак Обама билан учрашиш ва Россиянинг чўкаётган иқтисодини қутқариб қолиш учун Ғарб тарафидан киритилган санкцияларни юмшатишга ҳаракат қилиб кўриш. Демак, сессиянинг Путин ҳам иштирок этадиган кунларида Нью-Йорк жаҳон лидерлари тўпланадиган жойга айланса керак.

Бугун Қозоғистон Президенти Нурсултон Назарбой ҳам бу сессияда иштирок этиш баҳонасида Нью-Йоркга келиши Казинформ тарафидан хабар қилинди. У 26-29 сентябрь кунлари бу ерда бўлади.

Нурсултон Назарбой Бош Ассамблеяда нутқ сўзлаш билан бир қаторда, баъзи давлатларнинг раҳбарлари ва АҚШнинг йирик компанияларининг вакиллари билан учрашмоқчи.

Казинформнинг хабарига кўра, Қозоғистон Президенти Зўравонликка асосланган экстремизм билан кураш бўйича Саммитда қам иштирок этар экан. Аммо, бу қанақа Саммит эканлигига изоҳ берилмайди. Аммо, тушуниш мумкинки, “зўравонликка асосланган экстремизм” тушунчаси остида “ислом терроризми” ётибди.

Айнан шу Саммит туфайли, Ўзбекистон Президентининг ҳам Нью-Йоркга келиши мақсадга мувофиқ бўларди. Ҳар қандай йиғилишда ёш бола ёки тўтиқушдек “ҳамма муаммоларни тинч йўллар билан ечиш лозимлигини” такрорлайдиган Ислом Карим яна шундай қилган ва, масалан, ИШИДни тинч йўллар ва музокаралр воситасида тўхтатиш ҳақида гапирган бўларди. Саммит қатнашчилари ичида юмористлар бўлса, улар ИШИД билан музокаралр олиб боришни айнан Ислом Каримга топширишган бўларди ва унинг обрўси осмонларга чиқиб кетарди.
« Олдинги хабар Хабарлар рўйхати Кейинги хабар »