24 August 2015
22:52 - Уй-жойлари бузилган фуқароларга товон тўлаш тартиби кучга кирди
Ўзбекистон Миллий қонунчилик базасига фуқаронинг ер участкаси ва уй-жойи давлат ёки жамият эҳтиёжлари учун олиб қўйилиши муносабати билан товон тўлаш қоидалари киритилди. Шу пайтгача қонун ости меъёрий ҳужжат – Ўзбекистон Вазирлар Маҳкамасининг қарорига кўра ҳал қилинган бу масала энди қонунлаштирилди. Президент Ислом Карим томонидан имзоланган қонун билан Республика Уй-жой кодексига ўзгартишлар киритилди.

Кодексга киритилган ўзгартиришга кўра, эндиликда ер участкалари давлат ёки жамият эҳтиёжлари учун олиб қўйилиши муносабати билан фуқаролар мулкида бўлган уйлар (квартиралар) бузилган тақдирда, мазкур фуқароларга, бузиладиган уй (квартира)нинг бозор қиймати тўлиқ ҳажмда тўланади. Уй (квартира) эгаси – мулкдорнинг бу ҳуқуқи уларнинг оила аъзоларига, шунингдек ушбу уйларда (квартираларда) доимий яшаётган фуқароларга ҳам тааллуқлидир.

Шунингдек, айни пайтда ер участкасида мавжуд бўлган дов-дарахтларнинг бозор қиймати тўланади ёхуд бузилаётган уй (квартира), бошқа иморатлар, иншоотлар ва дов-дарахтларнинг бозор қиймати, шунингдек ер участкасига бўлган ҳуқуқнинг бозор қиймати тўлиқ ҳажмда тўланади.