23 July 2015
18:51 - Кеча Нью-Йоркда Эрон-“Олтилик” шартномасига қарши митинг бўлди, Ўзбекистонда ҳам бўлиши керак
Маълумки, Эроннинг ядровий программасининг қурол яратишга қаратилган қисмини тўхтатиш талаби билан йиллардан бери давом этган Эрон-“Олтилик” музокаралари яқинда тамомланди. Имзоланган шартномаган кўра, Эрон ядровий қурол яратиш ишларини тўхтатади, Ғарб эса, Эронга қарши киритлган санкцияларни бекор қилади. Эронга қурол сотиш, Эрондан нефть сотиб олиш таъқиқлари ҳам шу санкциялар рўйхатида эди.

Бу шартномга энг аввало Исроил қарши чиқди ва ҳатто бундай шартномани имзоламасликни Ғарбдан, айниқса, АҚШдан тўғридан-тўғри талаб қилди. Унга кўра, Эронга ишониб бўлмайди, Эрон ядровий қурол яратиш программасини тўхтатмайди, Эрон қурол сотиб олишни янгидан бошласа, унинг Яқин Шарқдаги вазиятни беқарорлаштириш йўлидаги ҳаракатлари яна ҳам кучаяди. Бошқа санкицияларнинг бекор қилиши ҳам Эроннинг Ғарбга нисбатан душманлик сиёсатини кучайтиради.

Маълумки, Эрон-“Олтилик” шартномаси АҚШда кучга кириши учун у Конгрессда тасдиқланиши керак. Конгресс раҳбарлари ва бир қатор конгрессменлар ҳозирданоқ бу шартномани тасдиқлашга йўл бермасликларини гапирмоқдалар. Уларнинг ҳаммаси Республикачилар Партиясидан сайланган. Республикачилар ҳозир Конгресс палаталарида кўпчликни ташкил этишини ҳисобга олсак, бу масалада улар ғолиб чиқишларининг эҳтимоллиги жуда катта. АҚШ матбуотида Нью-Йоркда ўтказилган Эрон-“Олтилик” шартномасига қарши митинг бу мамлакатдаги Исроил лоббичилари тарафидан уюштирлгани ва мтинглар воситасида Конгрессга босим ўтказилаётгани ёзилмоқда.

Яъна маълумки, “Ҳаракат” Агентлиги ҳам Эрон ўз ядровий программасини тўхтатмайди, деб ҳисоблайди. Аммо, муаммонинг бошқа тарафлари ҳам бор, дейди мухбиримиз. Ғарбнинг ўзи ҳам Эрон-“Олтилик” шартномасига ишонмайди, аммо ҳозир Эрон билан алоқаларни вақтинча юмшатиб, ИШИДни йўқ қилишда Эрондан фойдаланмоқчи. Агар шундай бўлса, яъни Эрон ИШИДни йўқ қилишда асосий роль ўйнаса, у тарихий ҳамкори Сурия билан Яқин Шарқда гегемон давлатга айланади. Ана ундан кейин Эрон Марказий Осиёда ҳам ўз кучини кўрсатиш учун ҳаракатлар бошлаши муқаррар.

Шундай экан, Ўзбекистон ҳам Эрон-“Олтилик” шартномасига қарши бўлиши керак. Аммо, Эроннинг дўсти Владимир Путин Ислом Каримга бундай қилдирмаслиги ҳам ўз-ўзидан маълум.