22 July 2015
08:16 - “Правый Сектор” (Ўнг қанот) ҳаракати қутурмоқда, Украинада ички уруш хавфи ортмоқда
Донбассда руслар билан урушда етакчи роль ўйнаётгани иддао этилаётган “Правый Сектор” (Ўнг қанот) номли ҳаракатга тегишли қуролли кучлар уюшган маҳаллий контрабандист гуруҳ билан, яна иддаоларга кўра, контрабанда соҳасини ўз қўлига олиш учун Запарожье вилоятининг Мукачева шаҳарчасида урушга киргани, бир неча одам ўлгани, Ички ишлар вазирлиги қўшинларининг қуролни ташлаш ҳақидаги буйруғига бўйсунмаган “Правый Сектор” ҳукуматга ҳам бўйсунмаслигини намойиш қилгани ҳақида 12 июлдаги хабар берган эдик. Шундан кейин Президент Петр Порошенко ва унинг ҳукумати билан “Правый Сектор” ўртасидаги муносабатлар сал кам душманлик даражасига етиб борди.

Кеча Киевдаги Мустақиллик майдонида тўпланган “Правый Сектор”нинг тарафдорлари “Йўқолсин сотқинлар ҳокимияти” шиори остидаги ўз йиғилишларини “умумхалқ қурултой” (вече) деб эълон қилдилар, кечқурун эса ўша яқин орадаги бинолардан бирида бу ҳаракатнинг ёпиқ қурултойи ўтказилди. Турли нашрлар ўз манбаларига асосланиб билдиришларича, қурултойда қуйидаги ёки шуларга ўхшаш қарорлар олинган:

- “Правый Сектор” энди ўзини “ҳарбий-сиёсий” эмас, “миллий-озодлик” ҳаракати деб ҳисоблайди.

- Сайловлар ўтказишдан воз кечилади, Украинадаги кризисдан чиқиш учун Минскда қабул қилинган қарорлар бекор қилинади, кўнгиллиларнинг, яъни “Правый Сектор”нинг қуролли кучлари легаллаштирилади.

- “Правый Сектор” мвжуд ҳокимиятга ишончлсизлик билдириш учун референдум ўтказиш ташаббуси билан чиқади.

- Донбасда бўлаётган воқеалар Россия билан уруш деб эълон қилинади.

Агарда вазият тезда ўзгармаса, Украинада ички уруш бошланиши муқаррардек кўринмоқда, дейди мухбиримиз. Агарда ички уруш чиқадиган бўлса, бундан ютадиган Россия бўлиши аниқ. У ҳолда, Қримдан кейин Донбасс ҳам Украинанинг қўлидан кетади.

Шунга ўхшаш воқе 1993 йили Озорбайжонда бўлган эди. Ўшанда ҳокимиятда бўлган Озорбайжон халқ фронти ичидаги ички низолар туфайли ҳокимиятни осонликча Ҳайдар Алиев қўлга қиритди. Мана ўшандан бери ҳокимият Алиевлар қўлида, аввал Ҳайдар Алиев, энди унинг ўғли Илҳом Алиев қўлида.

Расмда - “Правый Сектор” лидери, Украина Парламетининг депутати Дмитрий Ярош.