Бу мамлакатдаги Fox News агентлигининг хабарига кўра, Монтана штатида яшайдиган Натан Колер исмли эркак Виктория ва Кристин исмли аёллар билан ўз хотинларидек ҳаёт кечирар экан. Энди улар ўз мақомларини расмийлаштириб олиш ниятида маҳаллий судга мурожат қилишибди. Суд расмийси уларга жавоб бир ҳафтада берилишини айтибди. Монтана қонунларида, бутун АҚШда каби, икки хотинлик тақиқланган экан. Демак, қандай жавоб келиши ҳам олдиндан маълум.

Аммо, унутмайликки, ўтган ҳафта АҚШ Олий Суди бир жинсли жуфтларга турмуш қуриш ҳаққи берганди. Эсдан чиқармайликки, гомосексуаллар бундай ҳақни қўлга киритиш учун 20 йилдан кўпроқ вақт очиқча курашишган. Натан Колер, Виктория ва Кристин ҳам шу йўлдан боришмоқчими?

Улар учун осон йўл – мусулмончиликка ўтиш ва ўзларининг диний эркинликларига йўл берилишини талаб қилишдир. Маълумки, АҚШ ҳукумати бир қатор ноҳукумат ташкилотлар воситасида жаҳонда мусулмонларнинг диний эркинлиги таъминланишига эришиш учун ҳар йили юз миллионлаб доллар пул ишлатади. Бу ишни Америкадек демократик давлатда осонликча қилиш мумкин.

Ана ундан кейин Америкада мусулмонларнинг исломий давлат қуриш ҳаққини таъминлаш масаласи ҳам ўз-ўзидан кун тартибига келади.