28 May 2015
07:52 - ФИФА мутасаддилари коррупцияда айбланиб, ҳибсга олинди
Халқаро Футбол Ассоциациялари Уюшмаси (французча FIFA, русча ФИФА) раҳбарларининг АҚШ ва Швейцария прокуратуралари томонидан ҳибсга олиниши кечаги ва бугунги матбуотнинг энг етакчи мавзуига айланди. Маълум бўлишича, ФИФА раҳбариятининг бир неча вакили 2018 ва 2022 йилги Жаҳон чемпионатига мезбонлик ҳуқуқини тақдим этиш жараёни билан боғлиқ суиистеъмол ва пул ювиш айби билан жиноий жавобгарликка тортилган. Швейцария Бош прокуратурасининг маълум қилишича, терговчилар ФИФА компьютер тизимларида сақланган маълумот ва ҳужжатларни ҳам қўлга олган.

ФИФА матбуот вакили Уолтер де Григорио чоршанба куни зудлик билан ташкил этилган пресс-конференцияда ФИФА Бош котиби Жером Валке ва президенти Зепп Блаттернинг Швейцария расмийлари тергов қилаётган коррупция ишига алоқаси йўқ, дея билдирди.

Бу воқеа жаҳон ахборот воситаларининг диққат марказига айланиши унчалик мантиқли эмас, дейди “Ҳаракат” мухбири. Умуман спорт, айниқса, футбол аллақачон бизнессга айланиб кетиб бўлган. Бизнесс бор жойда эса, коррупция бор . Айнан ҳозир футболдаги коррупция билан шуғулланишга бошланишнинг орқасида нималар борлиги ҳам тезда маълум бўлиб қолади.