Бугун тушдан сўнг Ўзбекистон “қора бозор”ида саррофлар АҚШ долларини ҳатто 4000 сўмдан паст баҳога ҳам харид қилишга иккиланиб қолди. Ҳолбуки, ҳафта бошида бу кўрсаткич миллий валютамиз тарихида янги рекорд – 5000 сўмлик довондан ошганди. Саррофлар доллар курсининг кескин тушишини Ўзбекистон ҳукумати томонидан олиб борилаётган чора-тадбирлар, яъни Марказий Банкнинг конвертацияни тўхтатиши ва аҳолига доллар сотишни бекор қилгани, шунингдек, “қора бозор”ни таъқиб остига олгани билан изоҳламоқда.

Саррофлар фикрича, ҳукумат турли йўллар билан “қора бозор” курсини расмий курс билан тенглаштирмоқчи. Россиядаги инфляция ортидан келган ташвишлар Ўзбекистон ҳукуматини ҳам ўйлантириб қўйган. Боиси АҚШ доллари курсининг сакраши натижасида импорт товарлари нархи кескин ошди, аҳолининг харид қобилияти пасайди. Шунингдек, хориждан товар олиб келувчи тужжорлар сина бошлади. Ҳукумат шу боисдан валюта масаласида шок терапия ўтказмоқчи, аммо мамлакатда соғлом бозор муносабатлари йўқ экан, ҳукумат долларининг живолини тутиб тура олмайди.