14 May 2015
19:11 - Туркия Россияга қарши ҳужумга ўтди. Бу қанчалик жиддий? “Ҳаракат”нинг роли қандай?

Кеча ва бугун Туркиянинг Ўрта ер денгизи бўйидаги Анталия вилоятида НАТО мамлакатлари ташқи ишлар вазирларининг йиғилиши бўлди. Туркия уй эгаси бўлгани учун бўлса керак, йиғилишда бу мамлакатнинг Бош вазири Аҳмет Довудўғли ҳам (расмда) иштирок этди ва Россияга ҳужум деса бўладиган нутқ сўзлади.

Reuters Агентлигининг хабарига кўра, Аҳмет Довудўғли Қримнинг Россия тарафидан ноқонуний аннекциясига йўл қўйиб бўлмаслигини гапирар экан, НАТОни Украина ва қиримтатарларини қўллаб-қувватлашга чақирган.

НАТОнинг Бош котиби Йенс Столтенберг эса, Анталиядаги учрашувга таҳлил беиб, бу ҳарбий альянс ўзининг шарқий чегараларида машғулотлар ўтказишни кўпайтирилиши ва чегараларни қўриқлашни кучайтириши ҳақида гапирди. Табиий, бундай ҳаракатлар Россияга қарши қаратилгандир.

Аввалги хабарларимизда айтилганидек, Туркиянинг ҳозир ҳокимиятда бўлган исломий раҳбарлари ҳар қадамда Оллоҳни гапириб, ўзлари учун ғоя амалиётдан муҳимроқ эканлигини таъкидлашни яхши кўрсалар ҳам, амалда ишлар бошқача эди.

Масалан, Россия Қримни босиб олгач, қримтатарларнинг миллий лидери Мустафа Жамилўғлининг Қримга киришини тақиқланди. Лекин, руслар Туркияга сотилаётган газ нархини озгина туширишган эди, Президент Ражаб Эрдўғон Россиянинг Туркия орқали Европага газ олиб бориш учун газ қувури қуриш лойиҳасига қўшилди ва ҳатто Москвадаги 9 май парадига келмоқчи эканлиги эълон қилди. Аммо, Владимир Путин 24 апрелда Ереванга бориб, турклар арманиларга қарши геноцид қилганини гапиргандан кейингина, Ражаб Эрдўғон Москвага бориш режасидан воз кечди.

Айнан шу кунларда АҚШда чиқадиган машҳур Foreign Policy журналида эълон қилинган “Туркиянинг газ масаласидаги ўйламай қилаётган ўйинлари” номли мақоланинг маъносини эса, “Туркия газ масаласида Ғарбга хоинлик қилмоқд” деб ифодалаш мумкин эди.

Туркия раҳбарлари “Ҳаракат” агентлиги ва Foreign Policy журналининг фикрлари ҳамда Путиннинг арманлар геноцидини қабул қилишдан тўғри хулоса чиқариб, қримтатарларни яна ҳам қаттиқроқ овоз билан ҳимоя қилишга бошласалар ва Россиянинг Туркия орқали Европага газ олиб бориш учун газ қувури қуриш лойиҳасидан воз кечсалар яхши бўлади, дейди мухбиримиз.