11 May 2015
22:47 - Туркиянинг собиқ президенти оламдан ўтди, унинг жанозасига ҳозирги президент ва мухолифат партияларининг вакиллари қатнашмоқчи эмас
Бу мамлакатнинг 7-чи президенти Кенан Эврен 9 май куни 98 ёшида оламдан ўтди. На ҳозирги Президент Ражаб Эрдўғон, на Бош вазир Аҳмад Довудўғли, на парламент аъзолари бўлган мухолифат партияларинг лидерлари бу ўлимга муносабат билдирмадилар ва унинг жанозасига бормасликларини эълон қилдилар. Ҳамма гап шундаки, ўша вақтда Туркия қуроллари кучлари Бош штабининг бошлиғи бўлган Кенан Эврен 1980 йил 12 сентябрь куни ҳарбий давлат тўнтариши қилиб, президентлик курсисини эгаллаган ва 1982 йили умумхалқ сайловларида Туркиянинг 7-чи президенти этиб сайланганди. У 7 йиллик муддати ўтгач, ҳеч сиёсатга аралашмасдан яшади.

2014 йили 18 июнда Анқара суди уни ўша давлат тўнтаришида ва ундан кейин бўлган қама-қамашларда айлаб, умрбод қамоқ жазоси берган эди, аммо бу ҳукм юқори инстанцияларда тасдиқланишга ҳам улгурмай кучга кирмасидан Кенан Эврен оламдан ўтди.

“18 сентябрь ҳарбий тўнтариши” номи остида тарихга кирган бу воқеани баҳолаш хусусида турклар ичида ҳам бирлик йўқ. Лекин, Кенан Эврен исломчи партияларнинг кучайиб боришининг олдини олиш учун давлат тўнтариши қилгани ҳақида кўп гапирилади. Айнан исломчилар ҳокимиятнинг ҳамма соҳаларини қўлга олиб бўлгандан кейин Кенан Эвренга умрбод қамоқ ҳукми берилиши ҳам ўша гапларни тасдиқлайди.

Ҳарбий давлат тўнтариши йўли билан ҳокимиятга келган собиқ президентга кўрсатилаётган бу муносабат мантиқли кўринмоқда. Аммо, Туркияда ўша пайтда ҳам, ҳозир ҳам асл барқарорлик йўқлигини ҳам унутмаслик керак.
« Олдинги хабар Хабарлар рўйхати Кейинги хабар »