Анчадан бери кутилаётгандек, кеча АҚШнинг собиқ биринчи ледиси ва собиқ Давлат Котиби Ҳиллари Клинтон 2016 йилда бўладиган президент сайловларида иштирок этиш учун кураш бошлаганини расман эълон қилди.

У ўз қарорини шахсий веб-сайтида махсус видео кўрсатиш, электон почталарга хат тарқатиш ва матбуотдаги эълонлари орқали билдирди, дейилади Reuters агентлигининг хабарида. Бундан 8 йил аввал ҳам Ҳиллари Клинтон президент пойгасига кирган, аммо ўз партияси ичидаги бошланғич сайловлардаёқ Барак Обамага ютқазган эди.

Бу сафар, дейди Reuters мухбири, Ҳиллари Клинтон ўзи тарқатган видеода, аввалги кибр-ҳаволикни унутиб, жуда жонли кўринган, ҳазилдан ҳам қочмаган, АҚШнинг иқтисодий кризисдан чиққанини урғулаб, ўз президентлиги пайтида бундан ҳам яхши бўлиши ҳақида ваъдалар берган.

У ўтган сафар сайлов кампаниясини бошлаганда “Мен ғалабага кетаяпман” деган эди, бу сафар “Америкаликлар ҳар доим чемпионни кўришни истайдилар, ўша чемпион бўлмоқчиман” дебди.

Ҳозир АҚШнинг сиёсий саҳнасида Ҳиллари Клинтондек бошқа жозибали сиёсатчи кўринаётгани йўқ, дейди мухбиримиз. Демак, икки йилдан кейин 70 ёшга киришига қарамасдан, Ҳиллари Клинтоннинг президент бўлиш шанси жуда катта. Шундай бўлса, у АҚШ тарихидаги биринчи аёл президент бўлади.