28 January 2015
09:16 - Барак Обама Саудиянинг янги қироли билан Эр-Риёдда учрашди

АҚШ Президенти аввалдан режалаштирилган3 кунлик Ҳиндистон зиёратини бир кунга қисқартириб, кеча кечқурун Саудия Арабистонининг пойтахти Эр-Риёдга келди. Мақсад – ўтган пайшанба куни 90 ёшида оламдан ўтган қирол Абдулла ибн Абдул-Азиз Ас-Сауднинг оиласига таъзия изҳор қилиш ва янги қирол, аввалгисининг укаси Салмон ибн Абдул-Азиз Ас-Сауд билан кўришиб олиш эди.

Саудия Арабистонининг Араб дунёсидаги роли, унинг Эронга душманлиги ва нефтга бой мамлакатлардан бири бўлганини ҳисобга олсак, Барак Обаманнинг янги қиролни “қўйнига қўл тиқиб кўриш” ниятини тушуниш мумкин.

Reuters агентлигини АҚШ Президенти ва Саудия қиролининг учрашуви ҳақидаги хабари умумий гаплардан иборат бўлиб, янги қиролнинг АҚШ билан муносабатларда ўзгариш қилмаслиги ҳақидаги таҳлиллар бор. Аслида ҳам шундай бўлишига ҳеч ким шубҳа қилаётгани йўқ.