28 January 2015
08:04 - Dow Jones индексини яна жин урди, кеча эрталаб бир неча дақиқада сал кам 400 га тушиб, кейин бироз тикланди

Кеча эрталаб Нью-Йорк фондлари биржаси очилиши билан, унинг асосий кўрсатгичи - Dow Jones индекси – бир неча дақиқада салкам 400 га ўпирилиб тушди. Кейин бироз юксалиш бўлса ҳам, биржа бекилганда Dow Jones 17387 га тенг эди. Шундай қилиб, кунлик тушиш 291 (-1,65%) бўлди. Яъни, каттагина тушиш. Хўш, Нью-Йорк фондлари биржасини яна қандай жин урди.

Биржа экспертлари бу тушишнинг сабабини аниқ қилиб кўрсатдилар. Маълум бўлишича, АҚШнинг дев компаниялари акцияларининг нархи тўсатдан тушиб кетибди. Масалан, машҳур Microsoft компанияси акциясининг нархи 9,3% га тушиб кетибди ва $42,66 тенг бўлибди. Нефть саноати учун техника ишлаб чиқарадиган Caterpillar компанияси акциясининг нархи эса, нефть нархи тушиб кетаётгани туфайли 7,2% га тушиб, $79,85 га тенг бўлибди. Dow Jones индекси АҚШнинг энг катта 30 та компанияси акцияларининг ўртача нархи бўлгани сабабли, унинг тушушини тушунса бўлади.

Аммо, нефтнинг нархи бугун эмас, ярим йилдан бери тушмоқда. Нью-Йорк фондлари бозори буни кеча билиб қолибдими? Иккинчи савол - Microsoft компанияси акцияларининг нархи нимага тўсатдан шунчалик тушиб кетди? Нима учундир фондлар бозоринг экспертлари бу саволларни қўймаганлар, демак, жавоб ҳам йўқ.

Dow Jones индексини яна жин урган бўлса керак. У бир неча кунда яна ўзига келиб қолади.