20 December 2014
10:39 - Истанбул суди Фатхулла Гуленни ушлаб келиш ҳақида қарор чиқарди

Туркияда 14 декабрда фатхулла-гyленчилар ҳаракатига қарши бошланган ҳужумлар авжига чиқмоқда. Кеча кечга яқиин Истaнбул прокуратурасининг талаби билан Истанбул жиноятчилик суди Фатхулла Гуленни АҚШдан олиб келиб, терговга тортиш ҳақида ҳукм чиқарди.

Ражаб Эрдўғон ва унинг Адолат ва Тараққиёт Партияси ҳокимиятга келишида катта роль ўйнаган Фатхулла Гуленга қарши “қуролли террор гуруҳи тузиш ва уни бошқариш” ҳамда яна бир қатор айблар қўйилибди.

“Миллиёт” газетасига кўра, прокуратуранинг судга юборган талаб хатида шундай ифодалар ишлатилган: “Ахборот воситалари, иқтисод ва бюрократия соҳаларида қонун и низомларга зид равишда яратилган Хизмат ҳаракатининг лидери эканлиги шубҳа қилинаётган Гулен”.

Суднинг қарорига кўра, Фатхулла Гулен ушланиши билан 24 соат ичида Истанбул прокуратурасига топширилиши керак.

14 декабрда Туркиянинг хавфсизлик идораларида ўрта миён лавозимларда ишлаётган фатхулла-гуленчилар билан бирга бир қатор журналистлар, жумладан Сомонйўли Медия Гуруҳининг раҳбари Ҳидоят Қорача ва “Замон” газетасининг Бош муҳаррири Акром Туманли ушланган эди. Кеча суд Ҳидоят Қорачани ва хавфсизлик идораларида ишлаётган 3 мудирни ҳибсга олиш, Акром Туманлини юрт ташқарисига чиқиб кетмаслик шарти билан озод қилиш қарори чиқарди.