Аввалги хабарларимиздан маълумки, Нью-Йорк фондлар биржасининг асосий кўрсатгичи Dow Jones индекси сентябрь ойининг ўрталаридан тушишга бошлаб, октябрь ойнинг ўрталаригача 1 мингча поғана тушиб кетганда, биржа экаспертлари бу тушишларнинг сабаби сифатида Эбола касаллигининг Америкада ҳам тарқалиши, жаҳон иқтисодида ўсиш тезлиги камайиш эҳтимоллиги ва АҚШда марказий банк вазифасини бажарувчи Федерал Резерв қарзга бериладиган пул учун фойда фоизини оширишга шошилмаётганини кўрсатишган эди.

“Ҳаракат”нинг фикри бошқачароқ бўлди: Жаҳонда Нью-Йорк фондлар биржасининг келажагига салбий таъсир қиладиган жиддий жараёнлар бўлаётгани йўқ. Биржа бекорга талвасага тушди, тезда ҳамма нарса ўз ўрнига тушади.

Кейинги жараёнлар айнан “Ҳаракат” айтгандек бўлди. Ўтган ҳафта Dow Jones юсалишга бошлаб, бир ойлик тушишнинг ярми бир ҳафтада қопланганди.

Жорийдаги ҳафтада ҳам жараёнлар “Ҳаракат” башорат қилгандек, яни биржанинг ўсиши йўналишида давом этди. Ҳафта давомида ўсиб борган Dow Jones кеча, яъни ҳафтанинг охирги иш куни яна 195 поғона (1.13%) юксалиб, 17390 га чиқди. Яъни, тарихий рекорд бўлмиш 17395 га етди ҳисоб.

Вақтдан фойдаланиб, авваллари ҳам кўп марта такрорлаган фикримизни яна қайтарамиз.

АҚШда ишлаётган ўзбеклар фондлар бозорида кетаётган жараёнлар билан қизиқишлари, қўл билан ушлаб бўлмайдиган, кўзга кўринмайдиган Dow Jones каби индекслар билан яшашни ўрганишлари, пулларини фақат банкларда эмас, фондлар бозорининг акцияларида ҳам сақлашни ўрганишлари лозим.

Ўзбекистондаги ота-оналарга ёрдам бериш шарт, аммо у ерга ортиқча пул юбориш ўзбекларнинг душмани бўлган мавжуд режимга хизмат қилиш ва пулни сувга оқизишдир. Ўзбеклар АҚШда ҳам ош ейиш ва Ўзбекистонга пул юборишдан ташқари, бу ерда пул йиғиб, кичкина бўлса ҳам ўз бизнесларини очиш устида ўйласалар фойдали бўлади.

Айнан шундай одамлардан кейинчалик катта бизнесменлар чиқади. Ана ундан кейин Ўзбекистонда ҳам бизнес очишни ўйлаш мумкин. Акс ҳолда, Американи ҳам мардикорлар билан тўлатиб юраверамиз.