31 October 2014
20:46 - Украина парламентида энг кўп депутат Петр Порошенко Блокидан, аммо Бош вазир Халқ Фронтидан бўлади
Олий Радага ўтказилган сайловларнинг узул-кесил натижалари ҳали эълон қилингани йўқ, аммо умумий кўриниш ҳозирданоқ маълум.

Масалан, Петр Порошенко Блокининг Олий Рададаги фракция раиси бўлиши кутилаётган Юрий Луценко бугунги брифингда айтишича, бу фракция 450 ўринлик парламентда 150 депутатга эга бўлади. 54 киши партиялар рўйхати бўйича, 70 киши мажоритар окуруглардан сайланган. Аммо, мустақил номзод сифатида сайловда қатнашиб, ғалаба қозонганлардан 15 киши бу фракцияга кириш учун ариза берибди.

Ҳозирги Бош вазир Арсений Яценюкнинг блоки париявий рўйхатлар бўйича биринчи ўринни олган бўлса ҳам, ҳаммаси бўлиб қанча депутатга эга бўлиши маълум эмас. Аммо, тахмин қилиш мумкинки, у ҳам 150 атрофида ўрин олса керак. Бу иккита блок сиёсий қарашлари билан бир-бирига жуда яқин. Ҳатто, улар аввалига сайловларда битта блокда бўлишлари ҳам кутилган эди.

Президент Петр Порошенко янги ҳукуматда ҳам Бош вазир лавозимига Арсений Яценюкни таклиф қилишини билдириб бўлди. Демак, агар иккала блок келишса, айнан шундай бўлади. Украинада сиёсий барқарорлик нуқтаи назаридан қарасак, Президентнинг бу таклифи мутлақо тўғри.

Эслатиб ўтамиз, май ойида президентлик сайловларида Петр Порошенко ғалаба қозонгач, Арсений Яценюк Бош вазирликдан кетиш ҳақида истеъфо аризасини берганда, Петр Порошенко унинг ўрнига ўзига яқин сиёсатчи, шу йилнинг февраль ойидан бери вице-премьер бўлиб ишлаётган 36 ёшли Владимир Гройсманни тайинлаши кутилганди. Аммо, у ўшанда ҳам барқарорликни бузмаслик учун Арсений Яценюкни Бош вазирликда қолдирди. Ҳозир ўша Владимир Гройсман Олий Рада спикери бўлиши кутилмоқда.

Расмда - Арсений Яценюк ва Барак Обама, 12 март 2014 йил, Вашингтон.
« Олдинги хабар Хабарлар рўйхати Кейинги хабар »