Ўтган куни Kaраман вилоятининг Эрменеки туманида бир кўмир кони сув босиб, 18 киши конда қолиб кетгани ва катта эҳтимоллик билан улар ҳалок бўлгани тахмин қилинаётгани сабабли, кеча Туркияда Жумҳурият Байрами камтаринлик билан нишонланди. Янги Жумҳурбошқони Саройида биринчи марта уюштирилаётган тантанали қабул маросими бекор қилинди. Аввал Бош вазир Довудўғли, кейин Президент Эрдўғон кеч соатларда Эрменеки туманига келиб, сув остида қолганларни қутқариш ишлари қандай бораётгани билан танишдилар, сув остида қолган кончиларнинг оила аъзолари билан кўришдилар.

Аввалги хабарларимизда билдирилгандек, Туркия ўз ҳудудлари орқали Ироқли курдларнинг 150 кишилик ҳарбий отряди ва Башар Асадга қарши курашаётган суриялик араб гуруҳлари тузган Озод Сурия Армиясининг 1 минг 200 аскарига ИШИДниннг қўлида бўлган Кобани шаҳри тарафига ўтишга рухсат берганди. Улар ИШИД билан урушаётган Сурияли курдларга қўшилиб, Кобанини ИШИДдан тозаламоқчи эдилар.

Курдларининг эътирозларига қарамасдан, Туркия бугун кечаси биринчи бўлиб Озод Сурия Армияси аскарларини Кобани таарфига ўтказиб юборди (расмда). Ироқли курдларнинг отрядларига энди рухсат берилса керак. Туркиянинг мақсади аниқ – Кобани бутунлай курдларининг назорати остида қолишига имкон бермаслик.